Sigmund Gwaltshover, burger zu Wienn, hat gemacht auf seim hawss mit seiner zugehornung, in der Münsserstrass gelegen zenagst weilent Jacoben wuntartzt seligen haws. Seiner hausfrawen Magdalen, Jacoben Rechwein weilent burger zu Wienn seligen tochter, zwayhundert phunt Wienner phening zu rechter haimstewr und drewhundert phunt Wienner phening zu rechter morgengab nach dem statrechten zu Wienn. Doch also ob der egenant Gwaltshofer vor der bemelten seiner hausfrawn Magdalen mit tod abgienng und ir nicht kinder liess die sy miteinander hieten oder ob er ir kinder liess die sy miteinander hieten gehabt und vor derselben seiner hausfrau irer muter mit tod abgiengen, so sullen die vorgenanten iiic tl. d. morgengab nach derselben seiner hausfrau tod erben und gevallen auf sein nagst erben darauf sy zu recht erben und gevallen sullen oder wem er die schafft, ut littera sonat. Actum an Sambstag sand Dorothen tag, anno etc. lxviiivo.

Summa iiii tl. d.