Hanns Unverdrossen, helmsmid, und Barbara, sein hausfrau, habent verchaufft vir phundt gelts purkrechts auf irm halben haus mit seiner zugehorung, ganczes gelegen am Alten Kolmarkcht zenagst maister Niclasen Vörstl des wuntarczts haus an aim tail, davon man jerlich dint hern Jorgen Schrot, pharrer zu Manswerd obristen caplan Sand Peters cappellen und verweser der mess so Eberhart Kasstner pey Peilertor in derselben capellen zu stifften geschafft hat, zehen phunt phening die abczulosen sind mit hundert phund pheningen nach lautt ains purkrechtbriefs und den geistlichen herren hincz den Weissenprudern vir phund und vir schilling phening die auch abczulosen sind mit sechsunddreissig phund pheningen nach ains purkrechtbriefs lautt alles zu purkrecht und nicht mer. Umb drewunddreissig phunt und achczig phening, der zwayunddreissig phunt sind emalen gelegen gewesen auf Ulreichs Pernawer gurtler pey Peilertor haus, dem ersamen herren maister Hannsen Huber, pharrer zu Hindperg, caplan Gotsleichnams altar under dem newen turren dacz Sand Michel der von Eslorn stifftung, und seinen nachkomen und sind zu dienn zu drin tegen und wider abczukauffen miteinander und den nagsten dinst damit, ut littera sonat. Actum an Mittichen vor sand Maria Magdalen tag, anno etc. xlviiio.

Summa lxvi d.

Das purkrecht ist abgelost und zu dem puch erlegt worden, feria sexta ante Irene anno etc. liido.