Chunrat Phuntimaschen, dieczeit des rats der stat zu Wienn, hat versaczt sein halbs haws, undern Satlern gegen dem prunn úber gelegen, an aim tail, das von Jorgen und Pernharten geprúdern den Hidlern und irn swestern mit kauff an in kómen ist, mit allen den geméchen und gemainen stukchen, die nach lautt der tailbrief darczu gehórnt. Jörgen Phuntimaschen, sein sún, der noch nicht vogtper ist, und seinen erben, umb lxxxiiii tl. d., die im zugepurn von dem halben haws am Hohenmarkt undern Scherladen gelegen, das er von junkfraun Barbaren, weilent Hannsen Swebleins tochter seiner swester muterhalben, geerbt, und der vorgnantsein vater an seiner stat mitsambt dem andern seinem halfftentail desselben hauss verchaufft hat. Und sind zu beczalen wan derselb Jorg Phuntimaschen vogtper wírt, oder aber ungevogt abging, seinen nagsten erben, den dasselb gelt rechtlich zúgebúrn wírdet, an alles vercziehen. Actum an Mittichen vor Letare, anno etc. xlviio.

Summa v s. xviii d.

Nota den sacz hat der Jorg Phuntimanschen dem egenanten seinem vater ledig gesagt, an Freitag vor Stephani im snit, anno etc. lvto.